زعبوب رياح

زعبوب رياح


ماشي مرتاح


ضاربها طناش


رزقه جه .. او حتى مجاش


مش هامه وماشي قشاش


لا هو مسطول ولا عمره كان حشاش


ده منفض لكل حاجة


بارد زي التلاجة


في الحر لذيذ ولطيف


و في البرد بيبقى خفيف


وفي شغله دايما شريف


لا بياخد رشوة ولا بيعشق الاختلاس


وعمره ما يأذي حد من الناس


زعبوب والإسم انسان


قلبه إيمان مليان أشجان


عقله أمان دايماً هيمان


زعبوب تاني قوي وشديد


بيكسر حتى الحديد


مليان رمال وتراب


وبيقضي على أي سراب


بيطير العمر والشباب


في الصيف حر ونار


في الشتاء برد ودمار


زعبوبنا ماشي في الشوارع


راسه لفوق وطوله فارع


متعشي حمام متغدي كوارع


عمره في يوم ما كان محروم


يفتح درجه يقبض المعلوم


متربي طول عمره حرام


لا يعرف عشق ولا حتى غرام


معرفش ازي هو بينام


لو حتى سريره ريش نعام


ازاي هينام عليه ؟؟


ولا مينمش ليه !!


طول عمره بيه


عايش مش هامه الناس


متزوق بعقد دهب وبخاتم ماس


زعبوبنا خاين وحرامي


هب في مرة قدامي


وسرق مني أحلامي


خلاني بقيت زعبوب ضعيف


لاانفع في ربيع ولا حتى خريف


وزعبوب غيرهم مش شرير


صوته جميل زي العصافير


شاعر بيغني كمان


صوته يسحر الودان


وزعبوب طيب غيره


مالي الدنيا بخيره


قاعد بيصلي في جامع


أو ساكن حتى في ديره


وفي زعبوب غريب


وفي زعبوب حبيب


وهنعمل ايه !!؟؟


ما كلنا زعابيب ...